ИСТОРИЯТ СЕРБСКОГО НАРОДНОГО ТЕАТРУ

1861-1914.

Сербски народни театар основани 16/28. юлия 1861. року у Новом Садзе, у тадишнєй Царовини Австриї (од 1867. Австроугорска монархия). У Войводини по теди уж пановала длуга театрална традиция, од школярских дилетантских представох, по приватни професионални театрални ґрупи. Театер основани под час будзеня националней свидомосци и борби за националну шлєбоду. У тим периодзе у Новим Садзе векшина жительох сербскей народносци, вельке число високообразованих, три штварцини маєтку и трґовинох були у рукох Сербох, так же нє случайне же у Новим Садзе основани Сербски народни театар. Госцованє театралней ґрупи Йована Кнежевича 1860. порушало Йована Дьордєвича же би написал вецей статї у Сербским дньовнїку о нєобходносци снованя Сербского народного театру. Пририхтованя коло снованя окончовали Светозар Милетич, Стефан Брановачки, Йован Дьордєвич и Йован Йованович, познєйше Змай. Сербски народни театер основани на схадзки Сербскей читальнї на хторей предшедовал Светозар Милетич, першенствено як национална установа хтора мала задаток през драмску литературу и ґлумецки уметносци преношиц сербске слово и историю, побудзовац националну свидомосц и дзвигац културни уровень Сербох и з тим ше одуперац бечкей и пештанскей власци. Понеже Театер нє бул державна установа, Сербска читальня установела Дружтво за Сербски народни театер хтори ше будзе старац и финансовац Театер. Сновательна скупштина Дружтва була 29. и 30. мая 1862. року и на нєй принєшени и перши Устав Дружтва. Медзитим, на одобренє за снованє и роботу Дружтва чекало ше по 18. юлий 1865. року, кед го цар Франц Йозеф подписал. Член Дружтва, попри тедишнїх углядних людзох, могол постац кажди поєдинєц хтори уплаци 50 форинти и кажда правна особа хтора уплаци 100 форинти. Дружтво мало свой Управни одбор на чолє зоз началнїком и два оддїли: Театрални, хтори ше старал о ґлумецкей ґрупи, репертоаре и других фахових питаньох, и Економски, хтори обезпечовал материялни средства за роботу Театру. Скупштину Дружтва творели шицки члени поєдинци и представителє членох правних особох, а зиходзели ше раз рочнє. Месни театрални одбори були по цалей Войводини и мали задаток орґанизовац роботу Театру у своїх местох з нагоди госцованя. Перши управитель бул Йован Дьордєвич, хтори на тей функциї остал по 1867. кед ше одволал на поволанку княза Михаила и зоз половку ґлумцох пошол до Беоґраду и основал Народни театер. На Дьордєвичово место пришол Антониє Хаджич. Театер основани зоз дзевецерима ґлумцами: Димитриє Ружич, Димитриє Маркович Кикиндянин, Никола Неделькович, Коста Хаджич, Михаило Ґаврилович, Михаило Рац(кович), Младен Цвеїч, Стеван Чекич и Драґиня Попович (познєйше Ружич), а ютредзень, 17. юлия, прияти и: Любица Попович, Милица Ґрунчич и Никола Зорич. Перша представа була Приятелє Лазара Лазаревича и Хлопска метода и женска майстория Лайоша Кевера 23. юлия/4. авґуста 1861. року.

Театер давал представи по шицких местох у Войводини, алє госцовал и звонка Войводини. У Новим Садзе представи бавени у сали на поверху карчми При слунку, у сали карчми У кралїциЄлисавети (нєшкайши готел Войводина), влєце у арени ПриЖелєним венцу (на месце нєшкайшого Аполо-центру), од 1872. по 1892, кед звалєни будинок на Трифковичовей площи и од 1895. у Дундєрсковим театре (находзел ше у дворе нєшкайшого готелу Войводини и згорел у огню 22. януара 1928.), театрални будинок хтори велькомаєтнїк Лазар Дундєрски уступел Сербскому народному театру.

После першей децениї роботи Театер порушує и свою видавательну дїялносц – перше число новинох Театер вишло 26. децембра 1871, а ушорйовал го Антониє Хаджич. Од 1872. Театер порушал едицию Зборнїк театралних дїлох, у хторим обявйовани домашнї драмски дїла и преклади драмох странских писательох хтори були на репертоаре Сербского народного театру.

Тот перод роботи означели и управителє: снователь Йован Дьордєвич по 1868, його нашлїднїк Антониє Хаджич водзи Театер по 1879, потим дочасови управитель Димитриє Ружич по 1892, а потим ознова Антониє Хаджич та Димитриє Ружич по 1904. рок и пол Бранислав Нушич, потим Пера Добринович по 1911. и вец по Першу шветову войну Жарко Савич.

По Першу щветову войну Сербски народни театер бул барз любени медзи народнима институциями.

ИНФОРМАТОР О РОБОТИ СЕРБСКОГО НАРОДНОГО ТЕАТРУ НОВИ САД

1918-1941.

По войни Сербски народни театер роби у подполно нових политичних и дружтвених условийох – Войводина у составе новей держави. У барз чежких условийох, без державней помоци, Дружтво за Сербски народни театер обнавя роботу Театру. Управитель и предсидатель Дружтва бул др Дюра Трифкович. Перши ґлумецки ансамбл углавним творели предвойново члени, алє ше у тим периодзе часто менял бо театрални живот у Войводини бул богати, та поєдини ґлумци меняли театри и на вецей заводи ше ознова врацали. Перша представа Гей, Славянє Ристи Одавича отримана у сали Дундєрскового театру 12/25. у януару 1919. року. Пред представу шветочносц отвераня Театру почала зоз пригодну писню Пролоґ Аници Савич.

На скупштини Дружтва за СНТ 23. децембра 1919. векшина членох ше вияшнєла за подержавенє Театру. Вон постава державни 22. децембра 1919. и то под меном Новосадски сербски народни театер и роби по 31. децембер 1921. року. У сезони 1920/21. основана Оперета и кус познєйше Опера. У духу югославянства 1921. зоз шицких державних установох ше сцера национални одреднїци, та з тим и Сербски народни театер постава Народни театер. После огня кед згорел будинок Дундєрскового театру (22-23. януара 1928) Народни театер остава без будинку. Пошвидко и держава зменшала субвенцию и у марцу 1928. зєдинєла Народни театер у Новим Садзе зоз Народним казалиштем у Осєку до єдного театру под меном Новосадско-осєцки театер зоз шедзиском у Осєку и як таки робел по 1934. рок.

Медзитим, Дружтво за СНТ було нєзадовольне з одлуку же ше Сербски народни театер страцел у державней реорганизациї и тримало же з тим страцело свою културну, просвитну и националну мисию. Друштво за СНТ 6. новембра 1921. основало путуюцу ґрупу под меном Дружтво за Сербски народни театер – Театрална ґрупа „Йован Дьордєвич” и тота ше ґрупа 22. новембра 1921. зєдинєла зоз Покраїнским банатским театром „Стерия” у Вершцу и давала представи по Войводини, алє нїґда у Новим Садзе. Дружтво врацело мено ґрупи 17. фебруара 1924. и воно дїйствовало як Сербски народни театер по авґуст 1937. року.

Дужтво за СНТ ше нє мирело же є под контролу власци, а власц нє допущовала же би нє мала увид до роботи Театру. Же би ришела театралне питанє у Войводини, Банска управа 1934. утаргла и так малу субвенцию Сербскому народному театру и значни материялни средства додзелєла Народному театру у Беоґрадзе же би орґанизовал Секцию беоґрадского Народного театру за Дунайску бановину хтора будзе давац представи у Новим Садзе и местох по Войводини. Тота секция робела лєм у сезони 1934/35. року.

Од 15. авґуста 1937. на териториї Войводини єст два секциї Народного театру Дунайскей бановини (основани 25. априла 1936, а познєйше до назви додате княза намиснїка Павла). Перша секция дава представи у городох зоз стаємним шедзиском, а друга по местох Войводини. Тоту Другу секцию твори Сербски народни театер, бо 29. януара 1937. подписана резолуция о заєднїцким сотруднїцтве Народного театру Дунайскей бановини Княза намиснїка Павла и Управного одборуДружтва за СНТ. Сербски народни театер так роби по 14. май 1939. року, кед Дружтво розтаргує контракт о сотруднїцтве и Сербски народни театер зоз своїм Дружтвом предлужує самостойну роботу по вибиванє Другей шветовей войни.

Кед вибила Друга шветова война, у Новом Садзе престава кажди театрални живот. Часц Народного театру Дунайскей бановини дочасово пошла до Смедерева, дзе у страшней експлозиї погинули седамнацецеро ґлумци. После тей траґедиї, остаток ґрупи, зоз сагласносцу Министерства просвити, предлужел роботу у Панчеве цали час под час войни под меном Дунайски народни театер або Театер Дунайскей бановини.

Медзивойнови период найнєвигоднєйши период у историї Сербского народного театру. Нє удало му ше посцигнуц уметнїцки уровень предвойнового, алє ше заш лєм отримал свою мисию по местох Войводини и ширел просвитну, културну и националну думку.

1944 – по нєшка

По войни Сербски народни театер достава статус державней установи. Перша представа 17. марца 1945. була Напад Леонида Леонова. Драмски ансамбл творели ґлумци предвойнового Народного театру Дунайскей бановини хтори окупацию препровадзели у Новом Садзе, ґлумци Другей секциї истого театру, даскельо ґлумци цо пришли зоз Беоґраду и даскельо талантовани аматере. Од децембра 1944. по децембер 1951. роби под меном Войводянски народни театер. Першобутно представи бавени у будинку Мадярскей римокатолїцкей читальнї у порти Католїцкей церкви, а влєце 1945. отворена Лєтня бина у самей Порти. Будинок Дому култури (бувши Соколски дом, нєшка Театер младих) Театру уступени 1947. року. Тот будинок СНТ хаснує по усельованє до свойого будинку 28. марца 1981. року. Попри сцени у Доме култури, СНТ 2. октобра 1959. отворел свою Малу салу у улїци Йована Суботича 5, хтора од януара 1961. ноши мено Весели театер Бен Акиба (нєшка Новосадски театер).

Сербски народни театер основал 1947. Оперу, а 1950. Балет.

Од 1947. по 1959. рок у Новим Садзе робела Штредня театрална школа зоз двома оддїлами, ґлумецки и балетски (хтора преросла до Балетскей школи), а од 1964. по 1972. робел Драмски студио СНТ. И Школа и Студио оспособйовали млади уметнїцки кадер за роботу у СНТ. Сербски народни театер од 1961. вецей як два децениї мал свою друкарню под меном Друкарски погон Сербского народного театру, хтора ше находзела у улїци Лази Телечкого число 5.

Перши повойнови управитель бул Жарко Василєвич, а потим ше на тим положеню медзи другима находзели и: Влада Попович, Станислав Баїч, Боґдан Чиплич, Йован Коньович, Душан Попович, Радомир Радуйков, Милош Хаджич чийо ше управянє од 1958. по 1979. наволує златни период СНТ и велї други.

По войни важна часц каждей представи постава сценоґрафия и костим. По Першу шветову войну нє мож бешедовац о сценоґрафиї и костиме у правом смислу того слова. Представи бавени у даскелїх типизованих декорох, хтори були баржей декорация як права сценоґрафия. Елементи декорау костими куповани на розпредаваньох фундусу мадярских и нємецких театрох або од путуюцих нємецких и мадярских ґрупох. Ґлумци на початку бавели у своїх шматох, а познєйше доставали додаток на плацу за набавку нових. У медзивойновим периодзе першираз ше зявює сценоґраф – Миленко Шербан, маляр, хтори будзе у перших повойнових рокох робиц у Театруе После нього приходза сценоґрафи: Владимир Маренич, Стеван Максимович, Милета Лесковац и Борис Максимович, алє Театер анґажує и госцуюцих сценоґрафох: Миодраґа Табачкого, Ґерослава Зарича и др. Першого стаємного костимоґрафа Стану Ятич (Церай-Церич) Сербски народни театер приял на роботу 1948. року. Пред войну и такой после, костими робели Соня Шербан и Милица Бабич-Йованович. Седамдзешатих рокох XX вику у Театре достали роботу костимоґрафки Ясна Бадняревич и Миряна Стоянович-Маурич, a дочасово ше анґажує и госцуюцих: Лїляну Драґович, Божану Йованович, Анґелину Атлаґич и др.

Важни сеґмент роботи СНТ то видавательна дїялносц, у рамикох котрей СНТ видал велї кнїжки з историї Театру, зборнїки и велї пригодни публикациї (Памятнїца 1861-1961; Сербскому народномутеатру 1861-1986; В. Попович, Записи зоз театру; Л. Дотлич, Зоз нашоготеатру старого; Балет перши пейдзешат роки; Пейдзешатроки Опери; Драма Сербского народноготеатру и велї други). Новини Театер порушало Дружтво за СНТ 1871, перше число вишло 26. децембра, а остатнє нєдатоване 1908. року. У 1880. и 1883. новини нє виходзели, а 1881/82. видавани су як рок сезони под редакторством Антония Хаджича. Од 5. новембра 1909. по 31. януар 1910. новини ушорює Йован Ґрчич перше як Театер, а потим як Новитеатер. На початку сезони 1968/69. новини ознова порушани и од теди стаємно виходза.

Датум (16) 28. марца (1861) кед Йован Йованович и Стеван Брановачки послали поволанку же би зоз своїма прилогами помогли отверанє народного театру вжати за Дзень Сербского народного театру, кед ше здава посцигнуца зоз предходного року и наградзує заслужних. Найпресцижнєйша награда хтору ше теди додзелює то Награда Йован Дьордєвич.

СНТ 2006. року постало член Европскей театралней конвенциї и член Асоцияциї Kвартет, у хторей и театри з Мадярскей, Републики Ческей и Французкей. Сербски народни театер 2011. року бул домашнї Ґенералней скупштини Европскей театралней конвенциї, єдней з двох найугляднєйших европских театралних орґанизацийох, а два роки познєйше представитель СНТ-а вибрани за члена Борду (Управного одбору) тей Асоцияциї. Истого, 2011. року, будинок Сербского народного театру зоз средствох Фонду за розвой Войводини фундаментално реновирани.

Сербски народни театер вше бул єдна з найважнєйших културних институцийох у жеми, а нє треба забуц же СНТ иницировал снованє других културних институцийох, як цо то Стерийовтеатер 1956, Академия уметносцох 1970. и Театрални музей Войводини1982.

(На основи доступних жридлох и литератури, текст зложела др Милена Лесковац.)

ДРАМА

1861-1914.

Сербски народни театер основани як драмски театер, Драма основана кеди и сам Театер.

По Першу шветову войну у СНТ одбавени 630 драмски дїла на основи 392 домашнїх и странских писательох. У условийох такей гиперпродукциї, кед дзепоєдни фалати мали лєм премиєру, даєдни два-три, а менше число вецей репризи представох, пририхтовани барз швидко. О таким способе пририхтованя представи нє мож бешедовац з аспекту режиї. Скорей би ше могло бешедовац о поставяню основних рушаньох (мизансцену) хтори би, углавним, на даскелїх пробох после наученого тексту, робел први ґлумец у догварки зоз другима. Так представи пририхтовали Йован Дьордєвич, Антониє Хаджич, Димитриє Маркович, Лаза Телечки, Димитриє Ружич, Пера Добринович, Андрия Лукич, Веля Милькович, Димитриє Спасич, Милош Хаджи Динич, Коча Василєвич и други. Превладовал патетични, романтичарски стил ґлуми.

Члени першого ґлумецкого ансамблу були: Димитриє Ружич, Димитриє Маркович Кикиндянин, Никола Неделькович, Коста Хаджич, Михаило Ґаврилович, Михаило Рац(кович), Младен Цвеїч, Стеван Чекич и Драґиня Попович (познєйше Ружич), Любица Попович, Милица Ґрунчич и Никола Зорич. По Першу шветову войну на сцени Сербского народного театра бавели и: Лаза Телечки, Мария Неделькович, Никола Рашич, Дьордє Пелеш, Дюра и Мария Райкович, Илия Станоєвич Чича, Димитриє Спасич, Милош Хаджи Динич, Коча Василєвич, Веля Милькович, Павле Маринкович, Милева Рашич, Милица-Милка Ґрґурова, София Попович, Димитриє и Любица Коларович, Мария Цветкович, Тинка и Андрия Лукич, Пера и Єлисавета Добринович, Марта Тодосич, Милка Маркович, Даница Метеїч, Єфта Душанович, Драґа Спасич и велї други. У тим периодзе СНТ було розсаднїк одличних ґлумцох спомедзи хторих велї наступали з вельким успихом у Горватским народном казалишту у Заґребе и Народним театре у Беоґрадзе.

У тим периодзе будзенє националней свидомосци бул барз важни репертоар СНТ. Репертоар по 1914. бул рижнородни. Лєм у перших шейсцох мешацох ше операл на национални, а после ше давало драмски дїла зоз сцени театру у Бечу, Будапешту, Заґребе и Беоґрадзе, а дакус и зоз репертоару нємецких и мадярских путуюцих ґрупох хтори госцовали по Войводини. Вельки успих при публики мали фалати на тему зоз сербскей националней историї. Нєдостаток домашнього драмского тексту надополньовани з такволанима посербами – особи у странских драмских текстох доставали домшнї мена, а дїя ше премесцовала до сербских местох, зоз наглашку на сербске родолюбє. Найпопуларнєйши були фалати зоз националну тематику, углавним траґедиї и драмски прикази инспировани зоз штредньовиковну и новшу историю як цо то Шмерц Уроша V Стефана Стефановича, Милош Обилич (Битка на Косове) Йована Суботича, Гайдук Велько Йована Драґашевича и други. Попри того, окреме популарни були такволани фалати зоз шпиваньом, як цо драматизация прози Стевана Сремца – Зони Замфировей и Ивковей слави (музика Стевана Мокраньца), Дїда Янка Веселиновича и Драґомира Брзака (зоз музику Даворина Єнка), та Коштана Борисава Станковича (музика Стевана Мокраньца), хтора ше отрима на репертоаре по новши часи, потим Войновогосцекача и Циґана Еди Сиґлиґетия, Старого баке и його сина гусара Йожефа Сиґетия, Валалского нялкоша Емериха Тота и других. Прекладательна дїялносц у тим чаше була барз интензивна – нєридко ше случовало же ше сучасни французки або нємецки текст найдзе на репертоаре даскельо мешаци по шветовим правиводзеню.

Од домашнїх драмских писательох найвецей були заступени: Йован Ст. Попович, Атанасиє Николич, Лазар Лазаревич, Йован Драґашевич, Йован Суботич, Лаза Костич, Дюра Якшич, Матия Бан, Дьордє Малетич, Драґутин Илич, Милорад Шапчанин, Веля Милькович, Бора Станкович, Илия Окруґич Сремац, Янко Веселинович, Драґомир Брзак, Бранислав Нушич, а од иножемних: Шекспир, Молиєр, Шилер, Ґолдони, Ибзен, Ґете, Меяк и Мийо, Гауптман, Скриб, Лабиш, Диманоар, Денери, Сарду, Судерман, Шарлота Бирх-Пфайфер, Карло Обернїк, Шандор Лукачи и велї други.

1918-1941.

Перши ґлумецки ансамбл углавним творели предвойново члени: Любица и Милош Хаджи Динич, Даница и Коста Василєвич, Милка и Михаило Маркович, Драґа Спасич, Даница и Милан Матеїч, Катица и Воїслав Виловац, Ружа и Драґомир Кранчевич, Марта Тодосич, Мария-Мица Хаджич, Штефания Ленска, Милева Бошнякович, Савета и Йован Стойчевич, Пава Слука-Раїчич, Юлия Кучера, Димитриє Спасич, Добрица Милутинович, Миливоє Живанович, Милорад Душанович, Васа Иванович, Милка Маркович, и Пера Йовановићм, а познєйше ше ґу нїм приключели и: Божа Николич, Мария Вера, Радослав Веснич, Пава Слука, Раденко Алмажанович, Александар Верешчаґин, Зора Виловац, Светислав Савич, Драґолюб Сотирович, Станоє Душанович, Йован Харитонович, Хияцинта-Цинта Вуґринчевич-Харитонович, Надежда Архипова, Рахела Ферари, Мила Левова, Томислав Тангофер, Йован и Мила Ґец, Михайло Ковачевич, Ида Преґарц, Брана и Кая Цветкович, Станко Колашинец, Стоян Йованович и велї други. Режия и обука будуцих ґлумцох зверена искусним ґлумцом: Милошови Хаджи Диничови, Димитрийови Спасичови, Костови Василєвичови, Александрови Верешчаґинови, Йованови Ґецови, Брани Цветкович, Миланови Матеїчови и другим.

Репертоар медзивойнового периоду бул засновани и на домашнїм и на странским драмским тексту. На репертоар мали уплїв, попри Народного театру у Беоґрадзе, и репертоари странских театрох, так же теди обачлїви моцни уплїв французкого и русийского репертоару. Од домашнїх писательох найвецей бавени Йован Ст. Попович, Бранислав Нушич, Бора Станкович и други. Найвекши приход приношели представи робени по дїлох меншей литературней вредносци, так же найвекшу часц репертоару заберали французки водвилї бо були и найпопуларнєйши.

1944 – по нєшка

Вибор репертоару у перших рокох по войни бул медзи найважнєйшима елементами театралней политики. Циль бул же би ше театер приблїжел ґу народу и же би представи позитивно дїйствовали на народ, окреме же би то були фалати зоз ясним политичним порученьом у складзе Комунистичней партиї. Прето ше на репертоаре нє могли найсц фалати медзивойнового периоду: комедиї лєгкого жанру, водвилї, мелодрами…, а нє бул ридки случай же власци забранєли представу за хтору ше думало же загрожує режим. Так ше на репертоаре нашли дїла зоз войнову тематику, дїла русийских писательох и дїла нашей класичней драмскей литератури, насампредз Йована Ст. Поповича, Бранислава Нушича и Бори Станковича. Уж на початку пейдзешатих рокох, уплїв держави на роботу театру помали престава, та репертоар ознова составени з фалатох шветових и домашнїх класикох. Пошвидко на репертоар уходзи и сучасна шветова, алє и сучасна домашня драма, медзи хторима ше окреме визначую дїла Мирослава Крлежи, Борислава Михаиловича Михиза, Александра Поповича, Любомира Симовича, Йована Христича, Велимира Лукича, Душана Ковачевича, Синиши Ковачевича…

Найзначнєйши ґлумецки мена означели повойнову роботу Театру: Милан Айваз, Любица Раваси, Станоє Душанович, Рахела Ферари, Виктор Старчич, Олґа Животич, Любиша Иличич, Синиша и Любица Раваси, Станоє Душанович, Олґа Животич, Душан Животич, Славка Тошич, Жарко Митрович, София Перич-Нешич, Бранко Татич, Александар Стойкович, Славко Симич, Никола Митич, Стоян Йованович, Милан и Славка Тошич, Петар Вртипрашки, Лазар Боґданович, Франя Живни, Иван Гайтл, Миодраґ Лончар, Витомир Любичич, Стеван Шалаїч, Дьордє Єлисич, Велимир Животич, Раде Коядинович, Велимир Животич, Илинка Душанович, Славко Дьордєвич, Андєлия Веснич, Милица Кляич-Радакович, Добрила и Драґиша Шокица, Драґутин Колєсар, Заида Кримшамхалов, Милена Булатович, Стеван Ґардиновачки и други. У Беоґрадзе вєшенї 1947. основани Югословенски драмски театер и з тей нагоди даскельо члени СНТ вошли до того театру.

По войни бул период твореня новей режиї, та у Театре скоро вше були стаємни режисере: Йован Коньович, Юрий Львович Ракитин, Йосип Кулунджич, Бора Ханауска, Йован Путник, Миленко Шувакович, Димитриє Дюркович, потим Деян Мияч, алє робели и велї госцуюци режисере.

Нєшка Драму СНТ твори ансамбл над’звичайних ґлумцох хтори виводза представи по дїлох найвекших шветових и домашнїх класичних и сучасних писательох. Зоз жаданьом допринєсц афирмациї младих талантованих драмских писательох, Сербски народни театер 2004. порушал Проєкт три хтори конциповани як фестивал новей сербскей драми, односно авторох хтори по тераз нє виводзени на домашнїх професийних театралних сценох.

(На основи доступних жридлох и литератури, текст зложела др Милена Лесковац.)

ОПЕРА

1861-1914.

Од початку роботи Сербски народни театер як драмски театар пестовал музику, так же ше музични живот на сцени одвивал од першого дня. Инструментална и вокална музика були состойна часц велїх представох, понеже фалати зозшпиваньом були облюбени и децениями заберали важне место у репертоаре. Театер вше мал свойого капелнїка (дириґента), хор у хторим були ґлумци и менши оркестер у хторим грали єден час стаємни и гонорарни музичаре, а у периодзе кед нє мали свой оркестер, анґажовани воєни оркестер Городу. Перши капелнїк, Адолф Лифка, анґажовани 1862. Медзитим, аж 1865. року, кед анґажовани Аксентиє Максимович, наставаю перши ориґинални музични прилоги (по 1871. написал музику за 17 театрални фалати), а барз обачлїве и напредованє у подзвигованю виводзацкого уровня музичних ансамблох и хору Сербского народного театру. После Максимовича, капелнїки були и Алойзиє Милчински, Гуґо Доубек, Йован Миркович, Франя Ванєк, Антониє Туна Освалд, Антониє Улрих и Павао Влахович. Двацец роки познєйше, на предкладанє Мити Тополовича, одлучене же шицки ґлумци муша учиц нотне шпиванє. Перша оперета хтору Театер 1891. приказал була Врачарка Велї Мильковича зоз музику Емануела Пихерта. Викрок у репертоаре направени кед 1896. поставена опера Йованчиново сватово Виктора Масеа и рок потим франтовлїва оперета Красна Ґалатеа Франца Супеа у хторих анґажована оперска шпивачка Султана Циюкова. Од теди та по Першу шветову войну Театер, у складзе зоз своїма можлївосцами, пестує оперету. Попри спомнутих, на репертоаре були и: Княз Никола Зриньски И. Зайца 1899, Чаривништреляч К. М. Вебера 1900, Пустиняковдзвон Р. Маяра 1902, Проба за оперу А. Лорцинґа 1902, Ксения В. Парма 1909, Кавалерия рустикана П. Масканїя 1910, На швитаню С. Биничкого 1911, Предананєвеста Б. Сметани 1911, Дурнїло Р. Леонкавала 1912. и Княз Иво од Сембериї И. Баїча 1914. Найзначнєйши солисти того часу, попри Султани Циюковей, були Драґа Спасич (теди Стефанович) и Жарко Савич, шпивач окремного гласа – бас медзинародней репутациї, Стеван Дескашев, Штефания Ленска, Урош Юришич, Йоца Цвиянович, Лепосава Йованович, Антон Криж, Мария Шилханова, Лепосава Нишлич, Олґа Освалд и други.

1918-1941.

У медзивойновим периодзе, Сербски народни театер достава перши оперски ансамбл и з тим формує Оперу. Анґажовани дириґенти Хинко Маржинец и Ловро Матачич. Перша оперета Барон Тренк Сречка Албиния виведзена 29. новембра 1920. року. Попри домашнїх шпивачох, у ансамблу були и русийски и чески уметнїки: Божена и Карела Дубска, Емина Шилдова, Вера Ґорская, Мила Левова, Матилда Краль, Милица Авирович, Мицика Оливиєри-Илич, Єлка Йоцич, Михаило Верон-Волконски, Виктор Ґриґорєв, Александар Трошчански, Сергей Николаєвич, Исак Армиди, Николай Баранов, Евгениє Маряшец, Драґомир Кранчевич, Клеменс Клеменчич, Драґутин Врбаняц, Милан Оджич, Пая Банац и други. Число членох хору було пременлїве и рушало ше од 24 по 36 шпивачох. Пестовани стандардни оперски репертоар: Тоска, Кавалерия рустикана, Травията, Трубадур, Вертер, Мадам Батерфлай, Предатаа нєвеста, Дямиле, Чаривни стрилєц, Риґолето, Севильски байбер, Гофманово приповедки, Евґениє Онєґин, Кармен, Паяци и др. Оперетски репертоар бул вельо ширши, прето же пририхтованє оперетох було менєй вимагаюце: Циґанска любов, Кло-Кло, Княгиня чардашу, Баядера, Ґрофица Марица, Красна Єлена, Три дзивчатка, Школа за любовнїкох, Ґейша, Орфей у пеклє, Перикола, Мадам Помпадур и др. Медзитим, пре мали субвенциї и нєдостаточни приходи, з одлуку министра просвити 14. октобра 1924. року Сербскому народному театру утаргнута Опера, а концом марца 1927. року и Оперета. Потим оперски и оперетски представи бавени лєм з часу на час.

1947 – 2015.

З обнавяньом роботи Театру, по ошлєбодзеню на репертоаре було даскельо фалати зоз шпиваньом з народного живота. Перша оперета хтору Театер виведол 25. авґуста 1946. року була Мамзел Нитуш Рожеа Ервеа у хторей дебитовала Зденка Николич. У истей сезони виведзени и оперети Шкорванчок Ференца Лехара и Силва Имреа Калмана. На предкладанє Оддзелєня за просвиту Главного вивершного одбору Войводини, Министерство просвити Сербиї принєсло ришенє у юлию 1947. року же би ше у рамикох Сербского народного театру (теди Войводянского народного театру) формовала Опера. Воїслав Илич пришол на место дириґента, Владислав Перлдик бул корепетитор, а солисти були: Ерна Крже, Зденка Николич, лирски сопрани; Мия Липкович, драмски сопран; Любица Янкович, алт; Драґутин Бурич, тенор; Борислав Дечермич, лирски тенор и Иво Варґович, баритон. ОФормовани Хор и Оркестер, алє вони по сезону 1948/49. були у гонорарним анґажману. Перша премиєра обновеней Опери була Травията Дюзепеа Вердия 16. новембра 1947. року. Насловну улогу шпивала Ерна Крже, а репризу Зденка Николич хтора вецей як два децениї була главни ношитель лирско-колоратурних улогох.

Медзи визначнима солистами хтори охабели нємерлїви шлїд у Опери Сербского народного театру и: Деса Влайкович, Миряна Врчевич-Бута, Матия Скендерович, Олґа Бручи, Рудолф Немет, Аница Чепе, Златомира Николова, Франц Пухар, Влада Попович, Димитри Мариновски, Шиме Мардешич, Аранка Хечан-Бодрич, Франя Кнебл, Душан Балтич, Владан Цвеїч, Ирена Давосир-Матанович, Евґениє Марияшец, Светозар Дракулич, Єлена Єчменица, Мирко Гаднадєв, Воїслав Куцулович, Вера Бердович, Вера Ковач-Виткаи, Миодраґ Миланович и велї други.

За високи уметнїцки резултати хтори Опера роками посциговала заслужни и дириґенти: Воїслав Илич, Душан Бабич, Даворин Жупанич, Милан Асич, Предраґ Милошевич, Чила Ґаетано, Младен Яґушт, Лазар Бута, Душан Миладинович, Мариян Файдиґа, Владимир Тополкович, Еуґен Ґвозданович, Анґел Шурев, Йон Янку, Миодраґ Яноски, Любиша Лазаревич, Имре Топлак, Душан Михайлович, Весна Кесич-Крсманович, Желька Миланович, Александар Коїч, Микица Євтич и велї други.

У тим периодзе стаємни режисере у Опери були: Драґица Дамянович-Цегетмаєр, Марио Маринц, Емил Фрелих, Серж Вафиядис, Деян Миладинович, Октав Ениґареску, алє и драмски режисере: Йован Коньович, Йован Путник, Миленко Шувакович и Михаило Василєвич.

Репертоар Опери облапя найзначнєйши оперски и оперетски дїла шветових и домашнїх композиторох. Опера СНТ од 1947. року окремну увагу пошвецує виводзеню дїлох домашнїх композиторох. Так по нєшка виведзени шлїдуюци дїла: ораториюмска фреска Апотеоза Ивана Ковача, кантата Вишивачка шлєбоди Михаила Вукдраґовича, кантати Войводина, Шицки ми єдна партия и Чловек видик без краю, та и опера Ґилґамеш Рудолфа Бручия, опера Женїдба Милошова (Русалков шлаєр) Петра Коньовича, сценска визия музичней поеми Яма Николи Герциґонї, дзецинскей опери Їжикова хижка и Медведзова женїдба Зорана Йовановича, опера Княз Иво од Сембериї Исидора Баїча, опера Княз од Зети Петра Коньовича, дзецинска опера Медведзова женїдба Зорана Йовановича, опера Покондирена тиква Миховила Лоґара, дзецинска опера Ґаладнїчок Ернеа Кираља, опера Змерк Стевана Христича, сценска поема Там дзе було шерцо, нєшка стої слунко (муз. сотруднїк Еуґен Ґвозданович), кантата Учителє Душана Радича, як и опера Милева Александри Вребалов.

На сцени Опери Српского народного театру госцовали визначни оперски солисти з найпознатших оперских хижох: московского Большой театру, миланскей Скали, нюйоркскей Метрополитен опери, бечскей Державней опери, паризкей Комичней опери, як и з опери у Києве, Атини, Праги, Букурешту, Софиї, Темишваре, Сеґединє, Клужу и других. Тиж так, векшина солистох Опери Сербского народного театру поряднє госцовала на югославянских сценох, як и на иножемних. По 1991. рок Опера госцовала на шицких югославянских театралних сценох, як и у иножемстве: Италиї, Мадярскей, Болгарскей, Румуниї, Єгипту, а велї роки стаємно черала госцованя з Оперу у Сеґединє и Темишваре. Од 2012. року Опера СНТ знова одходзи на иножемни госцованя и фестивали.

ХОР – Длугорочни високи уметнїцки квалитет Хору Сербского народного театру нє сумнїви. За датум снованя Хору трима ше 16. новембер 1947. року, дзень кед виведзена перша премиєра, Травията, потим як обновена Опера. Тедишнї Хор бул у гонорарним анґажману и аж од сезони 1948/49. Опера ма свой стаємни хорски ансамбл. Високи критериюми у хорским шпиваню поставел ище перши дириґент Воїслав Илич, а свойо доприношенє у отримованю и унапредзованю дали и други дириґенти и корепетиторе: Милутин Ружич, Ладислав Перлдик, Владимир Тополкович, Мира Ґлиґич, Лїляна Крджалич, Анґелина Стефанович, Виктор Шафранек, Берислав Скендерович, Борис Черноґубов, Еуґен Гвозданович, Юрай Фелик, Весна Кесич-Крсманович, Наталия Михайловна-Арефєва и др. Од 1980. по 1989. рок, на инициятиву чланох Хору и дириґента Юрая Ферика, робел и Камерни хор музичного центру Войводини же би представел дїла вокално-инструменталней музики рижних епохох, од вокалней полифониї XVI вику, прейґ барокней, по сучасну югославянску вокалну музику.

Од 1996. року часц членох Хору Опери хтори були орєнтовани ґу духовней музики зишли ше у Хлопским камерним хору и освоєли публику зоз богату концертну активносцу. На їх репертоаре були литурґиї, першенствено домашнїх авторох, та окреме значне перше виводзенє Литурґиї Йосифа Маринковича. Виведзени тиж так и Боженствена литурґия Франческа Синика (1840), Литурґия Роберта Толинґера (1885), Литурґия Владимира Боберича (1908), алє и дїла других релиґийних традицийох, як цо Моцартов и Вердийов Реквиєм, Орфова Кармина бурана, Гайдново Штири рочни часци, кантата Вишивачка шлєбоди М. Вукдраґовича, Яма Н. Херциґонї, Войводина Р. Бручия и др.

Од 2002. роби и Женски камерни хор под руководством Весни Кесич-Крсманович. На репертоаре дїла найвекших шветових и домашнїх авторох хорскей музики як цо Ди Ласо, Палестрина, Албинони, Кодаль, Моцарт, Перґолези, а найвекши досяги посцигли у виводзеню Боженственей литурґиї св. Йоана Златоустого композитора Стевана Мокраньца, Аркадия Дубенского, Марка Тайчевича итд.

ОРКЕСТЕР – Театер у септембре 1945. року анґажовал музичарох Зору Душановић, гушлярку, и Лайоша Кесеґия, обоисту, цо бул початок формованя театралного оркестру. У наиходзацих рокох Театер предлужел примац нових музичарох, так же зоз снованьом Опери 1947. року Театер мал формовани инструментални ансамбл хтори по сезону 1948/49. бул гонорарни. Од теди по нєшка Оркестер ключни фундамент каждого оперского виводзеня. Од самого снованя високи квалитет уметнїцкей роботи отримує ше зоз стаємним фаховим усовершованьом и участвованьом у других уметнїцких ансамблох и установох як цо дакедишня Новосадска филгармония, нєшка активни Войводянски симфонийски оркестер, розлични оркестри Радио-Нового Саду, Новосадски камерни оркестер, Музична школа Исидор Баїч. Числени члени оркестри участвую у оркестерских проєктох Академиї уметносцох Универзитета у Новим Садзе.

Директоре Опери од 1947. року були (даєдни и вецей мандати) Влада Попович, Воїслав Илич, Даворин Жупанич, Иван Салич, Предраґ Милошевич, Лазар Бута, Влада Попович, Рудолф Бручи, Рудолф Немет, Мариян Файдиґа, Младен Яґушт, Еуґен Гвозданович, Душан Белич, Миодраґ Яноски, Рудолф Баранї, Воїслав Куцулович, Имре Топлак, Карло Ижак, Вера Ковач Виткаи, Бранислав Ятич, Нада Кокотович, Младен Саблїч, Миодраґ Миланович, Клаудио дел Монако, Славолюб Коцич, Марина Павлович Барач, Анґел Шурев, Душан Михалович, Берислав Скендерович, Миодраґ Миланович, Александар Коїч, Ира Проданов Країшник.

Ансамбл Опери Сербского народного театру и нєшка ма найлєпших солистох, шпивачох и музичарох хтори виводза дїла интернационалного и националного оперского нашлїдства, оперети, мюзикли, хорску музику и богату оркестерску продукцию.

(Текст на основи жридлох и документациї зложела др Милена Лесковац.)
Литература (вибор): Зборнїк Матици сербскей за сценски уметносци и музику ч. 45, Матица сербска, Нови Сад, 2011. (Светозар Рапаїч, Перши период роботи Новосадскей опери (1947–1961); Катерина Томанек, Музика на репертоаре Сербского народного театру у Новим Садзе (1861–1914); др Ира Проданов Країшник, Национални репертоар Опери Сербского народного театру (од 1990. по нєшка;); Теки Матици сербскей ч. 56, Матица сербска, Нови Сад, 2014 (Неманя Савич, Дньово новини Єдинство, Петар Коньович, балканизем и єдна можлїва историйна слика о Сербским народним театре (1861–1941); Бранка Коядинович, Вокални солистки у Сербским народним театре на початку 20. вику; Пейдзешат роки Опери, Памятнїца, прир. Весна Крчмар, Миодраґ Миланович и Душанка Радманович, СНТ, Нови Сад, 1997; Енциклопедия Нового Саду, ред. Р. Попов, кнїжка 18, Нови Сад, 2001.

БАЛЕТ

Балет Сербского народного театру (СНТ) у Новим Садзе основани 8. марца 1950. року. Перши уметнїцки танєц у Новим Садзе, медзитим, могол ше видзиц у 18. вику под час госцованя ґрупи Йозефа Бауерфайнда и Франца Шварца, а през 19. вик лєм з часу на час дзекуюци госцуюцим странским ґрупом, як цо була нємецка ґрупа Trauer Lust-Sing-spiele und Ballet. У медзивойновим периодзе Нови Сад нащивйовали странски балетски бавяче, пари, ґрупи и ансамбл балету Народного театру у Беоґрадзе зоз представу Копелия. То углавним були уметнїки хтори вишколовани у традициї русийскей класичней школи: Л. Визяков – В. Вечек, Й. Поляков – С. Стршнєв, пара Фроман, Н. Кирсанов – А. Фортунато, О. Соловєва, Е. Кучай, А. Милош, Т. Карсавиана – Лестер, К. Ґрунд, А. Жуковски, Н. Бошкович – М. Ристич, Р. Леви, Юренєв, Лучезарская, М. Оленїн, Удей Шан-Карали и Танєчни балет Народного театру у Беоґрадзе зоз К. Исаченко, Школа ритмично-пластичних танцох М. Маґазинович, школа М. Йовановича, Р. Де Лабан зоз тґупу, С. Мандукич зоз ґрупу итд.

Уметнїцки танєц од 1920. по 1927. пестовани у СНТ дзекуюци Клеменсови Клеменчичови, танєчнїкови, кореоґрафови, режисерови, ґлумцови и шпивачови. Нє лєм же пририхтовал шицки кореоґрафски точки за опери, оперети и драмски фалати зоз шпиваньом, алє у нїх и участвовал и вежбал танєчнїкох. Перши балетски пробованя направел зоз партнерку Валентину Валїну. Концом трицетих рокох у СНТ место Клеменчича анґажована Милена Чутукович-Попович, як танєчнїца и кореоґрафка, и вона и по Другей шветовей войни рихтала бависка за шицки представи СНТ. З обновйованьом 1947. року зявела ше моцна потреба за танєчним кадром, та у рамикох тедишнього театралного Драмского студия концом наведзеного року формоване Балетске оддзелєнє хторе уж 1948. преросло до Штреднєй балетскей школи. По снованє Балету, у СНТ як кореоґраф робела Даница Живанович, хтора 1948. року поставела кореоґрафию за комичну оперу Еро з гевтого швета Й. Ґотовца зоз фолклорнима танєчнїками и солистами Петром Єрантом и Ирену Киш, теди єдину балерину анґажовану у Театре.

У фебруару 1950. року тедишнї управитель СНТ Йован Коньович и Марґита Дебеляк отримали авдицию после хторей прияти 24 члени фолклорней ґрупи уметнїцкого ансамблу Централного дому ЮНА у Беоґрадзе под руководством Марини Олєнїни. То бул початок роботи Балету СНТ. Перши шеф, кореоґраф и педаґоґ балетского ансамблу була Марина Олєнїна, искусна русийска уметнїца хтора ше школовала на традициї класичного балету. Перша предстаца Шехерезада Н. Римски-Корсакова премиєрно виведзена 25. мая 1950. року. На початку роботи поставяю ше виривки зоз познатих балетох Бахчисарайска фонтана Б. Асафєва, Раймонда А. К. Ґлазунова, як и кратши балетски прикази симфонийских дїлох як цо Ноц на голим брегу М. Мусорґского. Роби ше источашнє и на поставяню опусу домашнїх авторох, та так виведзени Охридска леґенда С. Христича, Шерцо з медовнїка К. Барановича, Чорт на валалє Ф. Лотки и др.

У новоснованим Балету робели шлїдуюци солисти: Єлена Андреєв, Вера Блажич, Марґита Братоножич, Анита Ґрахек, Нада Симич, Єлица Нинкович, Єлена Ґлавонич, Соня Стоянович, Бойка Дьордєвич, Едита Анау, Бранислава Ковачевич, Вера Бояновски, Душанка Атлаґич, Славица Гатваґер, Оливера Ґромико, Ирена Киш, Ксения Ґлиґорич, Ерна Поленак, Вера Михайлович, Ружица Ґашпаревич, Любинка Корел, Борис Радак, Риста Ковачевич, Крсто Кузмановски, Петар Єрант, Стеван Израиловски, Жарко Миленкович, Аца Стоянович, Живорад Митрович, Дьордє Милошевич, Душан Ковачевич, Радован Крнайски, Радислав Ґлумац, Петар Клоц, Витомир Танкосич, Драґан Андєлкович, Никола Алимпич, Данило Зироєвич, Славко Павлетич, Крсте Кузмановски, Стеван Ґребелдинґер, Милорад Живанович и Милан Ґарич.

Єден з найзначнєйших датумох у историї Балету СНТ 8. януар 1955. року, кед першираз виведзене Лебедово озеро П. И. Чайковского зоз першу дипломовану ґенерацию Балетскей школи. Балет Крадош Ґаспара Р. Планкета, премиєрно виведзени 1956. року, бул значни крочай у напряме сучасного похопйованя уметнїцкого танцу. У наиходзацих рокох предлужело ше зоз анґажованьом младих, високообразованих танєчнїкох хтори охабели нєзабутни шлїд у историї Балету Сербского народного театру як цо: Даница Ракелич, Миряна Попович-Сенеши, Никола Петров, Стеван Ґребелдинґер, Франьо Гаєк, Миряна Матич-Миленкович, Раде Вучич, Миряна Ґруїч, Ксения Ґлиґорич, Єлена Михайлович-Гаєк, Єлица Нинкович-Прокич, Иґнят Иґнятович, Бранка Типелац, Гелмут Неделко, Мира Тапавица, Ґрадимир Панков, Ерика Маряш, Добрила Новков, Биляна Максич-Нєґован, Ото Рис, Юлияна Сремац, Апостол Христидис, Леонора Милер, Ґизела Тот, Растислав Варґа, Живоїн Новков, Владимир Єлкич, Амалия Петрич-Узелац, Мира Рушкуц, Ґабриела Теґлаши Велимирович, Оливера Ковачевич, Ясна Ковачич, Дияна Козарски.

Шефове, односно директоре Балету од снованя по нєшка були: Марина Оленїна, Ґеорґи Македонски, Макс Кирбос, Єлена Вайс Беложански, Иван Ико Отрин, Борис Тонин, Никола Никич, Жарко Миленкович, Гелмут Неделко, Иванка Лукатели, Ерика Маряш Брзич, Миряна Рушкуц, Добрила Новков, Биляна Нєґован, Нада Кокотович, Растислав Варґа, Ґабриела Теґлаши Велимирович, Ендру Питер Ґринвуд, Оливера Ковачевич Црнянски и Владимир Лоґунов.

Значни шлїд у Балету СНТ охабели и Ґеорґи Македонски, солиста, шеф Балету, кореоґраф и педаґоґ (1952-1955. и 1958-1964) хтори осучасньовал репертоар, алє и Ико Отрин, педаґоґ, кореоґраф, шеф Балету и танєчнїк з часу на час (1964-1968), хтори пробовал унєсц новосци и осучаснїц реператоар зоз дїлами як цо Павукова госцина, E=mc², Maмон (1964), алє затримал и дїла класичного балету як цо Пепелюґа С. С. Прокофєва (1965), Дон Кихот Л. Минкуса (1968), Щелкунчик П. И. Чайковского (1968), Есмералда Ч. Пунїя (1969), Нялкошка Л. Й. Ф. Геролда (1973). Под водзеньом Бориса Тонина, педаґоґа и кореоґрафа, Балет роби два сезони (1969-1971) и уключує до репертоару и домашнїх композиторох, насампред Рудолфа Бручия.

Под час седемдзешатих рокох 20. вику першираз ше поставя балетски представи и за наймладшу публику, та ше так нашли на репертоаре Петро Пан Б. Бєлинского, Червена Шапочка Т. Гартиґа, Пипи Длугока Ботоша К. Ципция, а познєйше и Гачатко Горбатко Р. Щедрина, Макс и Мориц Дя. Росиния.

З анґажованьом ґрупи румунских хлопских танєчнїкох 1980. року и з уходом до нового будинку СНТ, чия сцена давала по теди нєзадумовани можлївосци, Балет СНТ починал витворйовац нови уметнїцки задатки. Перша представа у новим будинку була Охридска леґенда С. Христича 13. априла 1981. року. Балет СНТ сотрудзовал зоз велїма кореоґрафами як цо Макс Кирбос, Вера Костич, Карол Тот, Пиа и Пино Млакар, Єлена Вайс-Беложански, Вера Бокадоро, Стела Пироґова, Mилица Йованович, Лидия Пилипенко, Владимир Лоґунов и Крунислав Симич, Нада Кокотович, Ендру Питер Ґринвуд, Eлдар Aлиєв (ЗАД), Дюла Гаранґозо (Мадярска), Ґай Вайзман (Голандия), Рони Гавер (Голандия), Сташа Зуровац (Горватска), Росана Хрибар (Словения), Ґреґор Луштек (Словения) и др. алє и зоз педаґоґами як цо Людмила Костина, Райко Пакаши, Лїляна Мишич и др.

Єдна зоз найзначнєйших представох у историї Балету напевно Грек Зорба Микиса Теодоракиса у кореоґрафиї Крунислава Симича, хтора премиєрно виведзена 1994. року и од теди є нєпреривно на репертоаре.

Од 1982. по 1991. рок отримоване Югославянске балетске змаганє, биєнално, за танєчнїкох и кореоґрафох. Снователь того єдинственого змаганя у историї югославянского балету була Концертна дїловнїца Музичного центру Войводини Сербского народного театру. Совит Югославяснкого балетского змаганя бул инициятор снованя националного комитету за танєц при UNESCО. Змаганє порушала и водзела Бранка Ракич.

Балет СНТ до 1991. року поряднє наступл на шицких театралних сценох Югославиї, алє и у иножемстве, у Италиї, Румуниї, Єгипту, Белґиї, Голандиї. Тота пракса актуална и нєшка. Як под’єдинка у рамикох Балету СНТ од 2002. роби и Форум за нови танєц же би оможлївел виглєдованє сучасного танцу и творенє нового театралного виразу. Од теди тота формация, чий инициятор Оливера Ковачевич-Црнянски, дава младим танєчнїком можлївосц за виглєдованє и преширйованє искуствох, оможлївює им усовершованє у сучасним танцу през розлични образовни програми–роботнї и преподаваня з еминентима кореоґрафами зоз жеми и иножемства. Резултат такого приступу числени представи и кореоґрафски миниятури.

(Текст на основи жридлох и документациї зложела др Милена Лесковац.)
Литература (вибор направела Проданович): https://www.snp.org.rs/ (текст написала др Милена Лесковац); Зборнїк Матици сербскей за сценски уметносци и музику бр. 45, Нови Сад, Матица сербска, 2011. (Др Свенка Савич, Кореоґрафи у Балету Сербского народного театру: Ико Отрин (1963–2011); Ґабриела Теґлаши Велимирович, Балет Сербского народного театру у новим будинку; Светозар Рапаїч; Лїляна Мишич, Балет – длугока драга по ровноправносц, Сцена – часопис за театралну уметносц, Нови Сад, Стерийово позорє, 2011; Лїляна Мишич, Кореоґрафи и танєчнїки – балетски преход часу у словох и слики, Театер ч. 3, Нови Сад, 1986; Лїляна Мишич, Балет з пирка вецей як пейдзешат сотруднїкох часопису Театер (1968–88), Театер ч. 2/3, Нови Сад, 1988; Штерацец роки Балету Сербского народного театру, моноґрафия (прир. Весна Крчмар, Душанка Радманович, Смиляна Лаґатор, Добрила Новков), Нови Сад, Сербски народни театер, 1990; Лїляна Мишич, Уметнїцки танєц у Новим Садзе од 1919. по 1950, Нови Сад, Театрални музей Войводини, 2009; Енциклопедия Нового Саду, ред. Д. Попов, кнїжка 3, Нови Сад, 1994.

БИБЛИОТЕКА

Сербска читальня принєсла одлуку же би ше 16. юлия 1861. року основало Сербски народни театер, а управительни роботи дали Йованови Дьордєвичови (1826-1900). Вон почал зберац и набавяц театрални дїла и фахову литературу за потреби Театру. Зоз серию своїх статьох хтори обявени у Сербским дньовнїку поволал Сербох же би помогли инициятиву снованя Театру. Пошвидко сцигую прилоги у пенєжу, предметох хтори добри за театрални реквизити, кнїжки: домашнї и странски преложени и нєпреложени драмски тексти, а на основи тих текстох робени посербйованя. Драмски дїла и даєдни фалати зоз репертоару Театер черал и зоз другима театрами. Управа Сербского народного театру видава 1872. року вибрани твори хтори присподобени за представи и обявює их як Зборнїк театралних дїлох у вецей як штерацец текох.

Список достатих кнїжкох у библиотеки Сербского народного театру у 2019. року.

Хронолоґийни попис нових кнїжкох у библиотеки Сербского народного театру у периодзе януар-октобер 2018. року.

Библиотека нєшка чува вецей як дзешец наслови зоз Зборнїка театралних дїлох: друге виданє Потьки Йована Йовановича Змая зоз 1876. року; Кральова шестричка Милана Йовановича з 1872; друге оправене виданє Максима Чарноєвича Лази Костича из 1887; Ромео и Юлия Вилиєма Шекспира з 1876. и други драмски дїла. Библиотека чува часопис Театер од першого числа зоз 1871. року. Найстарши драмски тексти ше преписовали и на тот способ умножовали за потреби ґлумцох. Преписовал их писар и архивар театралних дїлох, алє ше случовало же и сами ґлумци преписую дїла и улоги. Медзитим, анї єден таки текст нє зачувани, прето же огень у ноци медзи 22. и 23. януаром 1928. року залапел будинок Дундєрскового театру. У огню знїщени Архива и Библиотека, як и богати фундус декору и костимох. Згорели 4000 кнїжки, перши виданя драмских дїлох Стефана Стефановича, Йована Стериї Поповича, Константина Поповича Комораша, Йоакима Вуїча, Йована Суботича, Кости Трифковича, Лази Костича и других наших писательох.

После огня 1929. року, на обнови Библиотеки досц зробел Народни театер Дунайскей бановини под управу Марка Малетина. Набавени вецей як 2000 кнїжки по 1941. рок. У войни Библиотека значно очкодована. По Другей шветовей войни Сербски народни театер предлужел з роботу и почал систематичномо преширйовац фонд зоз драмску, музичну и другу фахову литературу. Року 1947. заняти и перши библиотекар и музични архивар Дюра Давидовац (1898-1968), хтори почал ушорйовац фонд и каталоґи. Библиотеку успишнє водзела идуци три децениї Славка Видакович по 1995. рок, спочатку самостойно, а познєйше и зоз пок. Иванку Максимович.

Фонд Библиотеки ше поряднє збогацує и посцигнул 26.000 фахово театрални публикациї, числени наслови периодики, вецей як 3.200 розлични насловидрамских текстох. Уникати, часописи и стари и ридки виданя ше хаснує у просторийох Читальнї. Библиотека публикациї набавя з купованьом, прейґ дарункох и з медзисобну черанку. Водзи каталоґ менови, предметни, фахови, каталоґ драмских дїлох, електронски каталоґ и каталоґ CD, DVD.

Трима ше же Библиотека Сербского народного театру нєшка єдна з найопременших найфаховших специялних театралних библиотекох.

УМЕТНЇЦКИ АРХИВ

Архив Сербского народного театру ше почал формовац з дньом снованя СНТ. Шицки материяли вязани за роботу Сербского народного театру з рока на рок ше звекшовали, та ше и з тим Архив формовал. Архив систематично збера, евидентує и обрабя материял хтори вязани за роботу Театру.

Нєшка ше материяли вязани за роботу Сербского народного театру чува у трох установох: материяли вязани за период по Другу шветову войну находза ше у Театралним музею Войводини, потим менша часц у Архиве Войводини, поготов материяли вязани за роботу Дружтва за Сербски народни театер, док ше у Архиве Сербского народного театру чува материяли хтори ше одноша на роботу Сербского народного театру од Другей шветовей войни по нєшка.

У фонду Архиву ше находзи материял хтори ше одноши на уметнїцку роботу Театру. Ту ше чува свидоцтва о роботи (плакати, програми, макети, сценоґрафски и костимоґрафски скици, фотоґрафиї, награди, прес-клипинґ) шицких трох уметнїцких єдинкох: Драми, Опери, Балету, од Другей шветовей войни по нєшка, як и досиєи шицких бувших и терашнїх роботнїкох СНТ. Шицок материял на розполаганю театролоґом и историчаром театрох, алє и шицким другим виглєдовачом. Тиж так, Архив дава и фахову и наукову помоц каждому науковому роботнїкови, виглєдовачови и историчарови Сербского народного театру.

КАСА

Роботни час:

През роботни днї од 10.00 по початок остатнєй представи
ВСОБОТУ од 14 годзин по початок остатнєй представи и
ВНЄДЗЕЛЮ, кед єст представи – од 17.00 по початок представи

СЦЕНИ – ТЕХНЇКА

Сцена Йован Дьордєвич або Велька сала ма патралїще зоз 935 шедовисками
– партер 727 места
– балкон 208 места

Сцена Пера Добринович або Мала сала ма патралїще зоз 373 шедовисками

Камерна сцена ма патралїще зоз 118 шедовисками

КОНТАКТ

СЕРБСКИ НАРОДНИ ТЕАТЕР
Театрална площа 1, 21101 Нови Сад
+ 381 21 6621 411